لديك أكثر من فرصة ...

[ملاك البحر]

انا النهاردة جايبلكو توبيك جميل اوي
هو متقسم على اربع نقط اقروهم وبجد هيعجوكو اوي

1-(انا مخنوق..زهقت ومليت خلاص..)


2-(انا محققتش اي حاجه انا بحلم بيها..انا حاسس اني ضايع)


3-(انا فاشل..انا مش ناجح..حتى الدراسه يادوب بعدي فيها بالعافيه)


4-(انا مكتئب اوي..وحاسس بحزن كبير عشان كذا..وكذا.....الخ)




ماتيجي نشوف ايه الحكايه بالظبط؟؟.. كل الحكايه انك مش عاجبك حالك.. مش عاجبك نفسك..حياتك..حتى المشاكل اللي بتتعرض ليها..كل رد فعلك تجاهها هو الاكتئاب..القلق..التوتر..الاعتراض..واخيرا......... الاستسلام للواقع اللي انت عايش فيه.. طبعا هتروح قايل لا..طبعا الحمد لله على كل شيء..تمام اوي وجميل جدا..طب ماتيجي نطبق الدعاء العظيم ده (الحمد لله) مش مجرد دعاء عظيم بقينا بنقوله كجمله اعتياديه..

1-(انا مخنوق.. انا مكتئب..زهقت ومليت خلاص..) :
مخنوق من ايه..؟؟ ومهما كان يا سيدي للي خانقك.ايه؟؟مالوش حل مثلا..افتكر انك عندك حلول كتيره..وهقولك انها موجوده بس انت اقتصر تفكيرك على احساسك بالخنقه وخلافه.. احساسك بالخنقه وغيره من الاحاسيس السلبيه مغطي على تفكير ايجابي سليم لتحديد المشكله وحلها..افتكر دايما ان الافكار السلبيه تؤثر تأثير سيء جدا على الافكار الايجابيه وبتشوش عليها كمان وعشان كده حاول تبص للمشكله بنظره حياديه وبأكثر من زاويه مختلفه..افتكر الوقتي كلام الخبير العالمي ابراهيم الفقي : (ضع في ذهنك دائما ان لكل مشكله ثلاث وجهات نظر..وجهه نظرك ووجهه نظر الشخص الآخر ووجهه النظر السليمه) افتكر ان ربنا سبحانه وتعالى مش خلقك بشر وليك عقل تفكر بيه..عبثا او بدون فائده..حاشا لله عز وجل..طب ماكان احسن بقى يخلقك اي كائن من الكائنات اللي حياتهم ماشيه بقوانين طبيعيه..وبدون تدخل ارادي منهم..
ربنا اداك حق الاختيار..الاراده..والتفكير.لكنك للاسف مش عملت بعقلك وتفكيرك حاجه غير انك خلقت لنفسك جو من التوتر والاحباط والخنقه..


افتكر برضه الوقتي وانا بكتب الموضوع كلام المفكر الكبير انيس منصور..في تشبيهه الرائع لإستخدامات العقل البشري..فبيقول :


(كأن العقل البشري هو منزل كبير فخم للغايه مجهز بأحدث التصميمات والراحه..والعقل البشري هو ذلك المنزل الكبير بكل ما حباه الله لنا من معجزات فيه..واستخدامنا لعقولنا كإشعال سيجاره..عن طريق اشعال ذلك المنزل الكبير..تخيل معي..كل هذا المنزل الكبير الفخم يشتعل كولاعه من اجل اشعال وتدخين سيجاره واحده ) وهو تشبيه يدل على مدى قصورنا في تشغيل عقولنا بالطريقه الصحيحه واستخدام عقولنا بشكل بسيط محدود وانه يجب استخدام عقولنا افضل استخدام ممكن في حل مشاكلنا في الحياه ومشاكلنا عموما


Free Your Mind .. بالمعنى الحرفي..حرر عقلك وتفكيرك..اعمل Stop لنفسك بالمعنى الحرفي للكلمه..شوف انت فين وايه اللي خانقك..وحاول حل المشكله..مفيش حاجه اسمها معرفش..مقدرتش..دي كلها افكار سلبيه بتأثر عليك..واياك تخليها تأثر عليك.. واستفيد من المشاكل اللي بتواجهك عن طريق تكوين خبرات لنفسك من المشاكل اللي بتواجهك..

2-(انا محققتش اي حاجه انا بحلم بيها..انا حاسس اني ضايع) :
تعالى هنا وقولي..حضرتك سنك كام بالظبط عشان تقولي الكلام ده كله؟؟ 17 سنه ولا 18 سنه ولا 19 سنه..ولا حتى 25 سنه؟؟ تسمحلي اقولك..حضرتك لسه طفل صغير في مدرسه الحياه الكبيييييره اوي..وانك تفكر كده وتقولي الكلام د بتاع الاحلام اللي انت محققتهاش يبقى تقوله..ربنا يديني ويديك طول العمر..لما يبقى عندك بقى بتاع 65 او 70 سنه كده..


افتكر ان الزمن لسه قدامك..متحصرش تفكيرك في اللي فات ومش اتحقق..او بمعنى اصح خليك ايجابي او عالاقل يا سيدي نقص بإيدك انت التفكير السلبي .. يعني ليه متخليش تفكيرك في الحاجات اللي نفسك تحققها..(اهدافك الرئيسيه)..بس اكيد بالتالي كلما كان الهدف كبير وبعده عنك في الوقت الحالي..هتلاقي انه مع الزمن حماسك هيقل للوصول لهدفك او تحقيقه..ياسيدي يبقى افتكر كلام د.ابراهيم الفقي اللي بيقول في الحكايه دي : (فكر نفسك دايما بالهدف..واكتب في ورقه الدوافع اللي بتخليك عايز توصل للهدف ده..اقرأ الورقه دي كل فتره وتخيل نفسك في المستقبل وانت بتحقق الهدف ده..بلاش يأس ابدا مهما كان الهدف بعيد..) فيها ايه دي؟؟ صعبه؟؟ ايوه فكر نفس دايما بهدفك لما تحققه..بحلاوه الانتصار والفوز على شيطان اليأس والاحباط اللي جواك..
افتكر انك وانت بتقرأ الكلام ده في غيرك ميعرفش يفك الخط ولا يعرف حاجه عن التعليم..صحيح فيه اللي بينجح في حياته رغم اميته وفيه اللي بيفشل بس الغالبيه العظمى استسلموا لحياه روتينيه ممله مفيهاش اي طموحات او نجاح..التعليم اللي مش عاجبك ده كونلك.. ولو بنسبه ضئيله..افكارك ومفهومك عن حاجات كتيره في حياتك..
لا لليأس بجد يا جماعه..استحضر الايمان وعظمه ربنا وخلقه في جسمك وفي كل الحاجات اللي بتشوفها بعنيك..عيش كل ثانيه كأنها آخر لحظه في حياتك..حقق هدفك الحالي(الدراسه) .. وافتكر ان لكل هدف رئيسي أهداف فرعيه او ثانويه لابد من تحقيقها..مثال بسيط..يا أخي دا انت عشان تشتغل في وظيفه لازم يكون عندك درايه كامله بالانجليش ومهارات الكمبيوتر ويا سلام لو معاك جزء من لغه تانيه..دا غير متطلبات تانيه كتير حسب نوع الوظيفه طبعا..بزمتك..مش لما تروح عشان تاخد كورس لغه هنا ولا كورس كمبيوتر هناك..مش دا كده تحقيق هدف ثانوي لتحقيق الهدف الرئيسي اللى هو الوظيفه اللي انت عايز تشتغلها؟؟


طب تعالى نبعد شويه كده ونبص من فووق اوي على حياتك؟؟.. هنلاقي ان الوظيفه برضه هدف ثانوي لتحقيق هدف رئيسي اكبر..وهكذا الدايره بتدور لحد اما تحقق هدفك الاساسي..


نهايه الكلام في النقطه دي.. إدي لنفسك فرصه واتنين وتلاته ومش مهم تفشل..والتوفيق في النهايه بيد الله عز وجل..لكن الفشل الحقيقي هو انك تبطل محاوله وتسجن نفسك في جو الاحباط ده..الزمن لسه قدامك..هدف حضرتك الوقتي..تفلسع من الدراسه على خير بإذن الله..

3-( أنا فاشل..أنا مش ناجح..حتى الدراسه يادوب بعدي فيها بالعافيه..) :


ياعم ماشي..حضرتك فاشل..مستريح انت كده؟؟ تمام..طب وبعدين؟؟..
ماهو حاجه من الاتنين..ياتغير فشلك ده لنجاح او عالاقل تقلل نسبه الفشل..يا تخلي شيطان اليأس والكسل ينتصر جواك ويعيشك في حاله من الاستسلام لأي فشل مستقبلي..
لو حضرتك هتختارالحاله الأولى يبقى كمل معايا قراءه..
لو انت هتختار الحاله الثانيه يبقى إقفل الموضوع ده وروح شوف حاجه تانيه..إيه ده؟؟ إنت لسه بتكمل قراءه؟؟ ياعم مش إحنا متفقين انك فاشل..؟؟ طب الكلام الجاي ده كله للي اختاروا الحاله الاولى.ايه بقى اللي جابك معانا..؟؟ لكن رغم كده انت بتكمل قراءه..


شفت انا قصدي ايه ؟؟ .. قصدي من الحركه اللي فاتت دي انك مهما كنت فاكر نفسك فاشل او شايف نفسك مش ناجح بس جواك رغبه صادقه انك تشوف حل لفشلك ده او انك تقلل نسبه الفشل..يبقى تبطل بقى تقول على نفسك فاشل وبتاع وانت مش قد الكلمه دي..هه؟؟ تيجي تكمل قراءه ونشوف حل سوا؟؟



هبدأ كلامي في النقطه دي بحكايه كلكم إن لم يكن فمعظمكم عارفينها..حكايه ال 9999 محاوله اللي قام بيها توماس اديسون(مخترع المصباح الكهربي) لاختراع المصباح الكهربائي..جمله سهله صح؟؟ طب تعالى كده نمسك الجمله دي بالتفصيل شويه..9999 محاوله..تخيل..لمجرد التخيل.. انك بتحاول تولع عود كبريت مش تخترع مصباح كهربي يا سيدي..وانك كل مره بتفشل انك تولع عود الكبريت ده..تخيل انك فضلت تحاول 9999 مره..تخيل كم التعب والارهاق والمعاناه اللي هتحس بيها..ودا إيه خلي بالك..مجرد عود كبريت بتحاول تولعه..
طب ليه الراجل مش يأس بقى وقالك ياعم بلاها نور.ماله الشمع؟؟ العشره بجنيه وحاجه زي الفل..
ومتقوليش دا توماس اديسون بقى وراجل فل ودماغه واخلاقه حاجه في العالي..
طب ماتيجي اقولك حكايه صغيره كده..توماس اديسون دا يا سيدي لما اشتهر طبعا وبقى ليه شركه كبيره ومؤسسات بإسمه..بقى بياخد عصاره افكار المخترعين الشباب وينسبها لنفسه..وبكل بساطه..يعني مكنش ملاك من الاخر كان واحد عادي جدا ليه مميزات وعيوب..بس المهم إنه معتبرش نفسه فاشل..


نفس القصه مع د.ابراهيم الفقي..لما كان بيقدم للاشتراك في بطوله البينج بونج وكذا مره المدرب يطرده ويرفض اشتراكه..كان كل يوم د.الفقي يروح بكل اصرارويقول للمدرب انه هيشترك وكده.. مش استسلم ابدا..ولا اعتبر نفسه فاشل..النتيجه ايه؟؟.. د.ابراهيم الفقي كان وهو شاب بيلعب تحت اسم مصر في دول العالم في البطولات العالميه..


نفسي اكمل والله بس بجد الموضوع كبير جدا ومحتاج كلام اكتر ولقيت ان احسن حاجه اختم بيها مقتطفات من كتاب( قوه التحكم في الذات) لدكتور ابراهيم الفقي..ومقتطفات من كتاب( ارسم مستقبلك بنفسك) لخبير التنميه البشريه الامريكي برايان تراسي ....


- قم بتطوير مهاراتك في تكوين العلاقات مع الآخرين وتذكر دائما ملاحظه الآتي :


1-عدم الحكم على الاخرين
2-عدم اطلاق الصفات السلبيه على الآخرين..وتذكر ان (من عاب ابتلى)
3-لاتسمح لل ((أنا)) السلبيه ان تقف في طريقك
4-لاتفترض ان من حولك يعرفون ما الذي تريده وما الذي تشعر به..فعليك للقيام بإخبارهم
5-لا تفترض إنك تعلم مايريده المحيطون بك..وبماذا يشعرون..إسألهم..
6-لا تربط نفسك بالأشخاص السلبيين لإن ذلك سينعكس على سلوكك
7- لاتقم بإنهاء أي علاقه على خلاف..فمثلا..لاتترك وظيفه وانت مختلف مع من كانوا حولك بل اترك وانت على علاقه طيبه بالجميع
8-إفترض حسن النيه في علاقاتك مع الآخرين..وكن مرناً ..لأن الشخص ذو المرونه هو الذي يتحكم في الأمور
9-تذكر ان سلوكك يمكنه ان يسبب تقدمك او تأخرك وإنه بإمكانك تغيير هذا السلوك..



وأخيرا ضع في ذهنك دائما أن هذه الحياه ليست بفرصه أولى للتجربه وأن عندك فرصه ثانيه وثالثه...هذه هي الحياه التي ستعيشها مره واحده فقط..

[طائر الاشجان]

الف شكر اختي ملاك موضوع رائع جدا
واعتقد ان كل الشباب يعانون من هذه المشاكل النفسيه
بصراحه هذه المشاكل النفسيه جميعنا نعاني منها
ولكنها تختلف من بلد الى اخر بحسب ظروف المعيشه
اما عني انا فاعاني من كل المشاكل الي طرحتيها اختي ملاك
ولكني مازلت متمسك بالامل الذي لولاه لانتهت بنا الحياه
واحب ان اقول لكل من يعاني من هذه المشاكل ان يتمسك بالامل
وان يدوا الله سبحانه وتعالى ان يفرج عنه كل هم ديني او دنيوي
فالله سبحانه وتعالى يقول ( ادعوني استجب لكم)
تقبلي حضوري البسيط اختي ملاك ودمتي للابداع عنوان

[همس الامواج]

يسلمووووووووووووووووووووو
ياملاك وتقبلي مروووووووري

[مراسي الشوق]

يعطيـــ أألف الف عاافيه مــــــــــلاك البحر ــك
على مووضووعك الحلووووووو
ومو غريبه عليك حبيبتي
الحـــــــــــلا مايجي منه ألا كل شي حلا
تقبلي مرووووووووووري
مع حبـــــــــــــــــــــــــي

[ملاك البحر]

ألف شكر على مروركم إخوتي :
طائر الأشجان
انسجام
مراسي الشوق